बुद्ध नेपालमा जन्मेकाबारे भारतीय दूतावासलाई ज्ञापन

काठमाडौ, जेष्ठ १३ - भगवान् गौतमबुद्धको जन्म नेपालको लुम्बिनीमै भएको विषयमा काठमाडौंस्थित भारतीय दूतावासको ध्यानाकर्षा गराइएको छ । नेपाल आदिवासी जनजाति महासंघले बुद्धजयन्तीको अवसर पारेर बिहीबार दूतावासको ध्यानाकर्षा गराएको हो ।

तथ्यलाई भारतीय सञ्चार माध्यमहरूले गलत प्रचार गरेको भन्दै महासंघले ज्ञापनपत्रका साथ 'बुद्ध नेपालमा जन्मिएका थिए' भन्ने सन्देश अंकित स्टिकरसमेत बुझाएको छ । भ्रम चिर्न देशव्यापी स्टिकर अभियान थालिएको महासंघका अध्यक्ष राजकुमार लेखीले विज्ञप्तिमा जनाएका छन् ।

'गौतमबुद्ध शान्तिका दूत हुन् भन्ने तथ्य बौद्धिक वर्ग, अनुसन्धाता, मानवशास्त्रीलगायत विश्वका हरेकलाई थाहा छ,' ज्ञापनपत्रमा भनिएको छ, 'उनै बुद्ध नेपालका महान् मानव हुन् । उनी रूपन्देही जिल्लाको लुम्बिनीमा जन्मिएको तथ्यप्रति भ्रम सिर्जना गरिनु हुन्न ।'

विज्ञप्तिमा छ, 'यो पवित्र अवसरमा भगवान् गौतमबुद्ध नेपालमा जन्मिएका हुन् भन्नेबारे भारत सरकारको ध्यानाकर्षा गराउन चाहन्छौं ।' महासंघले बिहीबार सा“झ नै बुद्धजयन्तीको अवसर पारेर शान्ति, संविधान र अग्रगमनको कामनासहित संविधानसभा भवनअगाडि दीप प्रज्ज्वलन गरेको छ ।
(कान्तिपुर)