स्पेन कि नेदरल्यान्ड ?

फुटबलको एक महिना लामो महासंग्राम आफ्नो उत्कर्षमा आइपुगेको छ　। भोलि मध्यरात हुने फाइनल भिडन्तले नयाँ विश्वविजेताको टुंगो लगाउनेछ　।

फाइनल जसले जिते पनि दुईवटा कुरा पक्का भइसकेका छन्　। पहिलो, विश्वविजेता बिल्कुल नयाँ हुनेछ　। दोस्रो, त्यो युरोपेली टोली नै हुनेछ　। दुई युरोपेली टोली स्पेन र नेदरल्यान्डबीच हुने फाइनल भिडन्तमा नेपालीको चासो उत्तिकै छ　। हामीले खेल क्षेत्रबाहिरका फुटबलप्रेमीहरूलाई सोध्यौं- फाइनल कसले जित्ला ?

मेरो समर्थनका सबै टिम हारे

वामदेव गौतम, उपाध्यक्ष, नेकपा एमाले

टेलिभिजनबाट साँझ आठ बजे प्रत्यक्ष प्रसारण भएका फुटबल खेल मैले नियमित जस्तै हेरेँ　। तर, राति १२ बजे हुने खेल भने त्यति साह्रो हेरिनँ　। विश्वकप फुटबलमा मेरो समर्थन रहेका सबैजसो देश हारिसके　।

मैले पहिला कोरियाको टिमलाई समर्थन गरेँ　। उसले हारेपछि मेरो समर्थन जापानलाई थियो, त्यो पनि हार्‍यो　। पछि ब्राजिललाई समर्थन गरेँ, उसले जित्ला भन्ने थियो, तर हार्‍यो　। ब्राजिलको हारपछि मेरो समर्थन अर्जेन्टिनालाई थियो, उसलाई पनि जर्मनीले हराइदियो　। फेरि मैले जर्मनीलाई समर्थन गरेँ, उसले पनि हार्‍यो　। अब फाइनल खेलमा मेरो समर्थन नेदरल्यान्डलाई हुन्छ　।

कोरिया, ब्राजिलले जितेमा म जति खुसी हुन्थेँ, त्यति खुसी अब हुन सक्दिनँ　। तर, मलाई अब नेदरल्यान्डले जिते हुन्थ्यो र उसैले जित्छ होलाजस्तो लागेको छ　। खेल हो भन्न सकिन्न　। स्पेनले पनि राम्रो खेल्दै आएको छ　। नेदरल्यान्ड केही अगाडि भए पनि दुवै टिमको राम्रो टक्कर हुनेछ　। मलाई नेदरल्यान्डको टिमवर्क र फोर्स राम्रो छजस्तो लाग्छ　। अहिलेसम्म मेरो समर्थनका सबै टिमले हारे पनि अब त जित्छ कि भन्ने लागेको छ　।

स्पेनसँग आत्मविश्वास छ

जेपी गुप्ता, सहअध्यक्ष मधेसी जनअधिकार फोरम

मलाई विश्वकप फुटबल हेर्न निकै मन पर्छ　। फुर्सद मिलाएर हेर्ने गरेको छु　। दुई-चार दिन त समय मिलाएर नै हेरँे　। तर, जति मिलाउन खोजे पनि समय नमिल्ने रहेछ　। सेमिफाइनलमा स्पेनको खेल हेरँे, खेल निकै मन पर्‍यो　। स्पेनको टिमसँग आत्मविश्वास छ　। उनीहरूमा टिमवर्क पनि राम्रो छ　। स्पेनलाई यो ऐतिहासिक अवसर पनि हो, त्यसैले यसपटकको विश्वकप स्पेनले नै जित्नेछ　।


स्पेनले जित्छ

नेत्रविक्रम चन्द 'विप्लब' नेता, एकीकृत माओवादी

मैले पहिलो उद्घाटनदेखि नै विश्वकप फुटबल हेरिरहेको छु　। खेलाडीमा मनपर्ने भन्ने कुनै खास खेलाडी छैन　। तर, मेरो मनपर्ने टिम अर्जेन्टिना हो, उसले हार्दा नमजा लाग्यो　। विश्वकपप्रतिको मेरो जति क्रेज थियो, अर्जेन्टिनाले हारेपछि त्यो क्रेज अलि कम भएको छ　।

फाइनलमा पुगेका स्पेन र नेदरल्यान्डमध्ये स्पेनले नै जितोस् भन्ने लागेको छ र जित्छ पनि　। स्पेनका टिमको खेल्ने कला मलाई खुब मन परेको छ, उनीहरूको कलात्मक खेलले नै उनीहरूलाई विजयी गराउनेछ　।


स्पेनले जितोस्

पम्फा भुसाल, नेता, एककीृत माओवादी

मलाई मनपर्ने खेल फुटबल हो　। समय मिलेसम्म ठूला खालका फुटबल 'म्याच'हरू हेर्न गरेकी पनि छु　। यसपटकको विश्वकप पनि उद्घाटनदेखि नै हेरिरहेकी छु　। अर्जेन्टिनाका मेसी मेरो मनपर्ने खेलाडी हुन्　। उनको खेल्ने कलाबाट प्रभावित पनि छु　। अर्जेन्टिनाका प्रशिक्षक म्याराडोना पनि मलाई मनपर्छ　। अर्जेन्टिना, ब्राजिल र स्पेन मेरो रोजाइका टिम हुन्　। सुरुमा यी तीनमा पनि ब्राजिल र अर्जेन्टिनामध्ये एकले जित्लान् भन्ने लागेको थियो　। तर, दुई टिम बाहिरिए　। अब बाँकी स्पेन छ, उसले जित्छ भन्नेमा ढुक्क छु　।

नयाँ शक्ति उदय होस्

अजम्बर काङमाङ राई, युवा नेता, एमाले

अहिले विश्वकप फिबर छ　। म पनि यसबाट टाढा हुने कुरै भएन　। सबै खेल त हेर्न पाइनँ　। नाम चलेका टिमबीचको खेल भने हेरेँ　। म सुरुदेखि नै महाशक्ति देश र नाम चलेका दुई देश- ब्राजिल र अर्जेन्टिनाको विपक्षमा थिएँ　। सेलिबे्रटीको पछाडि मात्रै लाग्ने प्रवृत्तिको म विरोधी हुँ　। पहिले विश्वकप जितेकाभन्दा अरू कुनै राष्ट्रले यसपटक जितोस् भन्ने मलाई लागेको थियो　। विश्वकपमा पनि नयाँ शक्तिको उदय होस् भन्ने मेरो चाहना हो　। सधैँ एउटा राष्ट्रको एकाधिकार राम्रो हुँदैन　। मलाई स्पेनमाथि विश्वास छ　। स्पेनले यसपटक विश्वकप जित्छ　।


स्पेनको खेल राम्रो छ

दिलीप प्रजापति, महासचिव, वाइसिएल

मेरो मनपर्ने टिम अर्जेन्टिना हो　। मेसी मनपर्ने खेलाडी हुन्　। तर, उनले त्यति राम्रो खेल प्रदर्शन गर्न सकेनन्　। यसपटकको विश्वकप अर्जेन्टिनाले जित्लाजस्तो लागेको थियो　। तर, सबै खेल आशा र अनुमान गरेभन्दा विपरीत देशले जिते　। अर्जेन्टिनाले हारेपछि अब मेरो समर्थन स्पेनलाई छ　। नेदरल्यान्डको भन्दा स्पेनका खेलाडीको खेल निकै राम्रो भएकाले विश्वकप उसैले जित्छ　।

स्पेन नै राम्रो

गोकर्ण विष्ट, नेता, एमाले

म त ब्राजिलको फ्यान हुँ　। ब्राजिलले विश्वकप जित्छ भन्ने लागेको थियो　। तर, यसपटकको अनुमान विपरीत भयो　। नसोचेका र नसुनेका टिमहरूले नाम चलेका टिमहरूलाई हराए　। जुन टिमले जित हासिल गरेको छ, सायदै ती टिमहरूले जित्लान् भनेर कसैले अनुमान गरेका थिए　। अब स्पेनले नै जितोस् भन्ने लाग्छ　। किनभने स्पेनका खेलाडीको खेल्ने कला राम्र्रो छ　। स्पेनका धेरै साथीसँग चिनजान र सम्पर्क भएकाले पनि स्पेनप्रति मेरो भावनात्मक सम्बन्ध जोडिएकोे छ　।

नेदरल्यान्डले जित्छ

रेखा थापा, नायिका

ब्राजिल, पोर्चुगल र अर्जेन्टिना मेरो मनपर्ने टिम हुन्　। ब्राजिलका काका, अर्जेन्टिनाका मेसी र पोचुर्गलका क्रिस्टियानो रोनाल्डो मेरो फेबरेट खेलाडी हुन्　। म यी तीन खेलाडीको फ्यान हुँ　। तीनवटै टिममध्ये कुनै एकले विश्वकप जितोस् भन्ने थियो, तर सबैले हारे　। आफ्नो मनपर्ने टिम बाहिरिएपछि विश्वकप हेर्दा त्यति रमाइलो लागेको छैन　। मनपर्ने टिम फाइनलसम्म आएको भए खेल हेर्दा रोमाञ्चक हुन्थ्यो　। त्यसैले पहिलेका खेल हेर्दा जति उत्साह थियो, पछिल्ला खेल हेर्दा त्यत्ति उत्साह छैन　। तर, अहिले मेरो समर्थन नेदरल्यान्डलाई छ　। उसले जित्छ भन्नेमा म ढुक्क छु　।

स्पेनको खेल आकर्षक

गगन थापा, नेता, कांग्रेस

कहिले घरमा, कहिले साथीभाइसँग बसेर सुरुदेखि नै विश्वकपका खेल हेरिरहेको छु　। ब्राजिल र अर्जेन्टिनमध्ये एकले विश्वकप जित्छ भन्ने सुरुदेखि नै लागेको थियो　। मेरो समर्थन पनि यी दुवै टिमलाई थियो　। सुरुका खेलहरू त उनीहरूकै सशक्त थियो　। पछि अप्रत्याशित रूपमा अन्य टिमहरूले हराए　। तर, यसपटकको विश्वकपमा सबैको अनुमानलाई गलत साबित गर्दै नयाँ टिम अगाडि आए　। अहिलेसम्मको खेल हेर्दा स्पनेले नै विश्वकप जित्छ किनभने स्पेनका खेलाडी बडो कलात्मक ढंगले खेल्छन्　।

नेदरल्यान्ड बलियो

प्रदीप पौडेल, अध्यक्ष, नेपाल विद्यार्थी संघ

विश्वकप सुरु भएयता संगठनको कामले धेरैजसो म उपत्यकाबाहिर बस्नुपरेको छ　। तर, साथीभाइसँग बसेर चर्चामा आएका टिमहरूबीचको खेल हेर्दै आएको छु　। फाइनल खेल पनि तनहुँमै बसेर हेरिन्छ होला　। मेरो मनपर्ने टिम अर्जेन्टिना हो　। उसले हारेपछि अब मेरो समर्थन नेदरल्यान्डलाई छ　। उसले जित्छ भन्नेमा म आशावादी छु　।

स्पेनले जित्छ

मानुषी यमी भट्टराई, स्वावियु सचिव त्रिवि

फुटबल मलाई मनपर्ने खेल हो　। फुटबलको महोत्सव विश्वकप सुरुदेखि नै घरमै बसेर हेरेकी छु　। सुरुमा अर्जेन्टिना र ब्रजिलमा एउटाले विश्वकप जित्छ भन्ने थियो, तर दुवै बाहिरिए　। यसपटकको विश्वकप आशा गरेभन्दा फरक भयो　। कसैले पनि यस्तो खालको हारजित होला भन्ने अनुमान गरेका थिएनन्　। फाइनलमा पुगेका स्पेन र नेदरल्यान्डमध्ये खेल राम्रो भएकाले स्पेनले नै विश्वकप जित्छ　।

नेदरल्यान्डले जित्छ

सुरेन्द्र महतो, उपाध्यक्ष नेपाल बार एसोसिएसन

अहिलेसम्मको खेल हेर्दा मलाई नेदरल्यान्डले नै विश्वकपको उपाधि जित्छजस्तो लागेको छ　। मैले यसपटकको विश्वकपमा सबै खेल त हेरेको छैन, तर नेदरल्यान्ड, जर्मनी, स्पेनलगायत देशका सबैजसो खेल हेरेको छु　।

त्यही आधारमा मलाई नेदरल्यान्डको खेल मन परेको हो　। स्पेनले पनि नराम्रो खेल्ने होइन, तर गोलपोस्टनजिकै पुग्दा पनि वा प्रहार गर्दा पनि स्पेनले गोल गर्छ कि गर्दैन भन्न सकिँदैन　। नेदरल्यान्डको 'टोटल फिनिसिङ' राम्रो छ　। सोही आधारमा नेदरल्यान्डले विश्वकपको उपाधि जित्नेमा म विश्वस्त छु　।

स्पेन बलियो दाबेदार

शम्भु थापा, पूर्वअध्यक्ष नेपाल बार एसोसिएसन

अहिलेसम्म विश्वकपका खेलहरू हेर्दा स्पेन बलियो दाबेदार हो　। स्पेनको खेल एकदमै स्तरीय छ　। ऊ युरोकपको विजेता पनि हो　। नेदरल्यान्डको तुलनामा स्पेनको खेल निकै राम्रो छ　।

तर, नेदरल्यान्डको खेल नराम्रो नै भन्न खोजेको होइन　। उसको खेल पनि राम्रो छ　। दुवै देशबीच धेरै कडा प्रतिस्पर्धा भने हुन्छजस्तो लाग्दैन　। ठीकै खालको प्रतिस्पर्धामा स्पेनले विश्वकपको उपाधि जित्नेमा म विश्वस्त छु　। (nayapatrika)