आज पहिलो बाघ दिवस / नेपालमा १ सय २१ पाटे बाघ

काठमाडौ, (नेस), विश्वबाट लोप हुने अवस्थामा रहेको पाटे बाघ संरक्षण गर्न सरकारले पहिलो पटक बाघ दिवसको आयोजना गर्न लागेको छ।

केही वर्षअघिसम्म नेपालमा सयौंको संख्यामा रहेको पाटेबाघको संख्या चोरी सिकारीका कारण मुलुकभर घटेपछि सरकारले त्यसको संरक्षणका लागि पहिलो पटक सम्मेलनको आयोजना गरेको हो।

आज बिहीबार आयोजना हुने दिवसमा बाघको संरक्षणका लागि बाघको बासस्थान पहिचान गर्ने त्यसको संरक्षणका लागि सरकारी तथा गैरसरकारी संस्थाबीच समन्वय गर्ने जानकारी राष्ट्रिय निकुंज तथा वन्यजन्तु संरक्षण विभागका महानिर्देशक गोपालप्रसाद उपाध्यायले दिनुभयो। सरकारी तथ्याङ्कअनुसार नेपालमा पाटेबाघको सख्या १ सय २१ रहेको छ। सरकारी उदासीनताका कारण यसको संख्या नेपालमा दिन प्रतिदिन घट्दो अवस्थामा रहेको छ।

सरकारले हाल नेपालका विभिन्न निकुंजहरुमा रहेको बाघको पछिल्लो संख्याबारे आज सार्वजनिक गर्दै छ। नेपालमा मुख्य गरी पाटेबाघ चितवन राष्ट्रिय निकुंज बर्दिया राष्ट्रिय निकुन्जमा पाइने गरेको छ। सरकारले पहिलो पटक आयोजना गर्न लागेको बाघ दिवसमा केही पत्रकारलाई मात्र निमन्त्रणा गरेपछि पत्रकारहरुले विभागको रबैयाप्रति आक्रोश पोखेका छन।

बाघ दिवसको बारेमा जानकारी दिन आयोजना गरिएको पत्रकार सम्मेलनमा विभागका उपसचिव झमकबहादुर कार्कीले सीमित पत्रकारहरुलाई बोलाएको भन्दै साचारकमीलाई बेवास्था गरेपछि उनलाई पत्रकारहरुले जिज्ञासा राख्दा आफूलाई यसबारेमा थाहा नभएको भन्दै आफ्नो जिम्मेवारीबाट पन्छिन खोजेपछि पत्रकारहरुले उनलाई र्याखर्याख्ती पारेका थिए।

मुलुकको अस्थिर राजनीतिक अवस्थाको फाइदा उठाउँदै भइरहेको अवैध चोरी-सिकारी र संरक्षित तीव्र वन जंगलको फडानीका कारण बाघको बासस्थान असुरक्षित बन्दै गएका कारण नेपालमा बाघको संख्या दिन प्रतिदिन घट्दै गएको छ। नेपाल सरकारले सन् २०२२ सम्ममा बाघको संख्या दोब्बर बनाउने लक्ष्य लिएको भए पनि सरकारको फितलो नीतिको कारण यो संख्या दोब्बर हुने सम्भावना ज्यादै कम रहेको बाघ विज्ञहरु बताउँछन्। झन्डै ४० वर्षअघि नेपालमा बाघको संख्या १ हजारको हारहारीमा रहेकामा सरकारी नीतिकै कारण यसको संख्या घट्दै गएको भन्दै विज्ञहरुले सरकारी तहबाट हुने काम-कारबाहीमा आमूल परिवर्तन नभएसम्म यस्ता दिवस मनाउँदैमा बाघको संरक्षण प्रभावकारी नहुने उनीहरुको तर्क छ। (samacharpatra)