१३ विद्यार्थी संगठन आन्दोलनमा

नयाँ पत्रिका, काठमाडौं, २९ असार, त्रिभुवन विश्वविद्यालयबाट प्रमाणपत्र तह हटाउने निर्णयको विरोधमा १३ विद्यार्थी संगठन आन्दोलनमा उत्रने भएका छन् । भरपर्दो विकल्प तयार नगरी प्रमाणपत्र तह खारेज नगर्न चेतावनी दिँदै उनीहरूले संयुक्त आन्दोलनको घोषणा गरेका हुन् ।

विद्यार्थी संगठनले अघिल्लो वर्ष विद्यार्थी संगठन र शिक्षा मन्त्रालयबीच भएका सहमति कार्यान्वयन नभएकाले प्रमाणपत्र तह खारेज गर्न नदिने निर्णय गरेका छन् । उनीहरूले ज्ञापनपत्र बुझाउनेदेखि धर्ना तथा प्रदर्शनसम्मका आन्दोलनका कार्यक्रमको घोषणा गरेका छन् ।

विद्यार्थी संगठनले मंगलबार पत्रकार सम्मेलन गरी आन्दोलनका कार्यक्रम घोषणा गरेका हुन् । ३० असारमा शिक्षा मन्त्रालय, त्रिवि, उच्च माध्यमिक शिक्षा परिषद्मा समयसीमासहितको ज्ञापनपत्र बुझाउने, ३१ मा त्रिवि सभालाई लक्षित गरी विरोध प्रदर्शन गर्ने आन्दोलनका कार्यक्रम छन् । त्यस्तै, ३२ असारमा व्यवस्थापिका संसद्मा लबिङ गर्ने, २ साउनमा परिषद् र त्रिवि पदाधिकारीको कार्यालयमा तालाबन्दी गर्ने र ३ र ४ साउनमा शिक्षा मन्त्रालयमा धर्ना र सभा गर्ने पनि विद्यार्थी संगठनले जनाएका छन् ।