पानी पिउन नपाउँदा परीक्षार्थीको मृत्यु

सइन्द्र राई, (नागरिक) खोटाङ, असार २- लोकसेवा परीक्षामा भाग लिन खोटाङ आएका एक परीक्षार्थीको प्रचण्ड गर्मीका कारण मृत्यु भएको छ। ललितपुर उपमहानगरपालिका-१३ का ३१ वर्षीय कमलकुमार सञ्जेलको मङ्गलबार साँझ मृत्यु भएको हो।

खोटाङको राजापानी-४ स्थित वेलडाँडामा सञ्जेलको मृत्यु भएको जिल्ला प्रहरी कार्यालय खोटाङका प्रहरी नायव उपरिक्षक टेकबहादुर तामाङले बताए। पानी पिउन समेत नपाउँदा, स्वासप्रश्वास रोकिएपछि उनको मृत्यु भएको, उनीसंगै परीक्षा दिन आएका परिक्षार्थी विकास बञ्जराले बताए।

सञ्जेलको लाश पोष्ट मार्टमका लागि जिल्ला अस्पताल दिक्तेलमा ल्याइएको छ। परीक्षा असार पाँच गते हुँदैछ। जिल्लामा पानी नपरेपछि, तापक्रम बढेको छ।

यता, लामो समयसम्म खडेरी खानेपानीको मुहान सुकेपछि, खाल्ले-२, का समुदाय काकाकुल भएका छन्। पानीको मुहान सुकेपछि, त्यहाँका २५ घर परिवार काकाकुल भएको खानेपानी उपभोक्ता समिति अध्यक्ष प्रेम पौडेलले बताएका छन्। त्यहाँ खानेपानीको अन्यत्र स्रोत समेत नभएको पौडेलले बताए। (nagariknews)