दलहरूद्वारा चितवन बन्दको आह्वान

चितवन (रत्ननगर), १६ जेठ । चितवनका राजनीतिक दलहरूले आज चितवन बन्दको आह्वान गरेका छन्। विपी कोइराला क्यान्सर अस्पतालका कार्यकारी निर्देशक डा भक्तमान श्रेष्ठको खोजीका लागि दबाब दिन चितवनका सम्पूर्ण राजनीतिक दल तथा भक्तमान बचाऊ अभियानले संयुक्तरूपमा चितवन बन्दको घोषणा गरेका हुन्।

बेपत्ता भएको १३ दिन पुग्दा पनि उनको अवस्था सार्वजनिक नभएको भन्दै प्रशानलाई दबाब दिन बन्दको आह्वान गरिएको हो ।

बन्दका कारण आज बिहानदेखि सवारीसाधन ठप्प भएको छ। चितवनका सम्पूर्ण शैक्षिक संस्था तथा कलकारखानासमेत बन्द गरिएको माओवादी चितवनका इन्चार्ज अनिल शर्माले जानकारी दिनुभयो। उहाँका अनुसार परीक्षा भने सुचारु हुनेछ।

यस्तै दलहरूले डा. श्रेष्ठको अवस्थाका बारेमा छानबिन गर्न उच्चस्तरीय छानबिन आयोग गठन गर्नसमेत माग गरेका छन्। आज साँझसम्म पनि अवस्था पत्ता नलागे पुनः बैठक बसेर कडा आन्दोलन गर्ने निर्णय भएको एमाले चितवनका अध्यक्ष कृष्ण खनालले जानकारी दिनुभयो।

बन्द आह्वान गर्नेमा नेकपा (एमाले), नेपाली काँग्रेस, एकीकृत नेकपा (माओवादी), नेकपा (माले), राष्ट्रिय जनमोर्चालगायतका दलहरू रहेका छन्।

यता चिकित्सकको आन्दोलनका कारण क्यान्सर अस्पतालका बिरामीहरूले भने राम्ररी उपचार पाउन सकेका छैनन्। उपचार नपाएपछि उनीहरू बिचल्लीमा परेका छन्। चितवनका चार ठूला अस्पतालबाहेक अहिलेसम्म अन्य अस्पतालमा स्वास्थ्य सेवा उपलब्ध हुन सकेको छैन। - रासस