भारतसँग चिसो सम्वन्धका कारण पाकिस्तानी प्रम नेपाल हुँदै भुटान जाने

लेखनाथ पाण्डे, थिम्पु (भुटान), वैशाख १३ - १६ औं सार्क शिखर सम्मेलनमा भाग लिन पाकिस्तानका प्रधानमन्त्री युसुफ राजा गिलानी नेतृत्वको पाकिस्तानी प्रमण्डल आज नेपाल हुदै थिम्पु आउने भएको छ। भारतसँग तनाबपूर्ण सम्बन्धका कारण भारतीय आकाश भएर नआई उनी काठमाडौं हुँदै आउन लागेका हुन्।

यसअघि सन् २००२ मा नेपालमा ११ औं सार्क शिखर सम्मेलन हुँदा पनि तत्कालीन सैनिक शासक परवेज मुसर्रफ चीन हुँदै नेपाल आएका थिए। त्यतिबेला पाकिस्नात र भारतबीच कश्मीर र कारगिलको भूमिविवादलाई लिएर सम्बन्ध तनाबपूर्ण थियो।

पछिल्लो समय करिव डेढ वर्ष अघि मुम्बईमा आतंककारी आक्रमण भएपछि दुई देशबीचको सम्बन्ध तिक्ततापूर्ण छ।
प्रधानमन्त्री माधवकुमार नेपालका परराष्ट मामिला सल्लाहकार राजन भट्टराईले पाकिस्तानी प्रधानमन्त्री गिलानील काठमाडौंमा एक रात विताउने र प्रधानमन्त्री माधवकुमार नेपालसँग द्धिपक्षीय वार्ता गर्ने जानकारी दिए।
पाकिस्तानी प्रधानमन्त्री गिलानी र नेपालबीच झण्डै ४५ मिनेट सिंहदरबारमा भेटवार्ता हुनेछ।
वार्तामा द्धिपक्षीय व्यापार अभिबृद्धि मुख्य मुद्धा बन्ने उनले जानकारी दिए। नेपाल र पाकिस्तान नजिकको छिमेकी भए पनि नेपाल भारतको तुलनामा नेपाल पाकिस्तान व्यापार सून्यप्रायको स्थितिमा छ।
नेपालबाट केही काष्ठकला, र हस्तकला र बाँसका उत्पादन पाकिस्तन निर्यात हुन्छ भने पाकिस्तानबाट छाताका सामान, कपास लगायत वस्तु आयात हुन्छ। द्धिपक्षीय व्यापार केही करोडमात्र छ, यो अर्बको रेन्जमा समेत पुगेको छैन, भट्टराईले नागरिकसँग भने।
उनका अनुसार पाकिस्तानले यसअघि नै प्रस्ताव गरेको नेपाल पाकिस्तान सुपुदर्गी सन्धीबारे पनि दुई नेताबीच छलफल हुनेछ। तर, कुनै निचोडमा भने नपुग्ने अधिकारीहरुले बताएका छन्।
दुई देशबीचका पछिल्लो राजनीतिक अवस्था, दुवै देशले सामना गर्नुपरेका सशस्त्र गतिविधि र छिपक्षीय र बहुपक्षीय विषयमा छलफल हुने प्रधानमन्त्रीका प्रेस सल्लाहकार विष्णु रिजालले नागरिकलाई बताए।
यो वर्ष नेपाल र पाकिस्तानबीच कूटनीतिक सम्बन्ध स्थापना भएको स्वर्ण वर्ष हो। ठीक ५० वर्षअघि दक्षिण एसियाका दुई निकट छिमेकीबीच कूटनीीतक सम्बन्ध स्थापना भएको थियो।
कूटनीतिक सम्बन्धको स्वर्ण जयन्ती वर्ष परेकाले पनि पाकिस्तानी प्रधानमन्त्रीले नेपाल आउने चाहेको भट्टराईले जानकारी दिए। तर, पाकिस्तनले यो भ्रमणलाई अलि भब्य बनाउन चाहे पनि नेपालकै आन्तरिक कारण र सार्क तयारीका कारण आधिकारीक बनाउन नसकिएको परराष्ट मन्त्रालयका अधिकारीहरुले बताएका छन्।

पाकिस्तानले भ्रमणलाई सकेसम्म औपचारिक र द्धिपक्षीय बनाउन चाहेको थियो तर हाम्रै कारण र सार्क सम्मेलनका कारण त्यो संभव भएन, परराष्टका ती अधिकारीले भने । (नागरिकन्यूज)