विद्यार्थी नेता शिक्षक र अधिकृत

भवानीश्वर गौतम नयाँ पत्रिका काठमाडौं, ११ वैशाख विद्यार्थी संगठनको नेतृत्व विद्यार्थीले नै गर्नुपर्ने सामान्य मान्यता हो　। तर, सबै विद्यार्थी संगठनको नेतृत्व विद्यार्थीले मात्र गरेका छैनन्　। केही विद्यार्थी संगठनका नेता शिक्षक र सरकारी अधिकृतसम्म छन्　।

शिक्षण पेसामा लागेका नेविसंघका नेताहरू धेरै छन्　। नेविसंघका कार्यवाहक अध्यक्ष प्रमोदहरि गुरागाई नै पेसाले शिक्षक हुन्　। नेविसंघका उपाध्यक्ष ऋषिकेशजंग शाह पनि शिक्षक नै हुन्　। नेविसंघकै केन्द्रीय सदस्य मधुकर खनालले पनि शिक्षक पेसा अँगालेका छन्　।

नेविसंघका कार्यवाहक अध्यक्ष गुरागाईंले काठमाडौंका तीनवटा कलेजमा पढाउँछन्　। उनी त्रिभुवन विश्वविद्यालयको आंगिक सरस्वती क्याम्पसका करार शिक्षक हुन्　। उनले समाजशास्त्र विषय पढाइरहेका छन्　। त्यसैगरी उनले रेडन कलेज र दक्षिणढोकाको जय देवकोटा कलेजमा पढाइरहेका छन्　।

विद्यार्थी नेताले आफूहरू शिक्षण पेसामा संलग्न भएको खुलाउन चाहँदैनन्　। तर, पढ्दा र पढाउँदाको अनुभव भने उनीहरू सुनाउँछन्　। नेविसघका उपाध्यक्ष गुरागाईं भन्छन्, 'विद्यार्थी जीवनमा धेरै पढेजस्तो लाग्छ, तर पढाउँदा कुरा नबुझी परीक्षा दिए जस्तो लाग्छ　।' उनले शिक्षण पेसाबारे खुलेर कुरा गर्न भने चाहेनन्　।

नेविसंघका अर्का उपाध्यक्ष ऋषिकेशजंग शाह सल्यानका सरकारी स्कुलका शिक्षक हुन्　। नेविसंघ स्रोतका अनुसार उनी बैठक वा संगठनको कामले काठमाडौं आउँदा सट्टामा शिक्षक राखेर आउने गरेका छन्　। तर, उनले आफ्नो पेसा छाडेका छैनन्　। संघका केन्द्रीय सदस्य मधुकर खनालले पनि राजधानीको हनुमानढोका कन्या माविमा पढाउँदै आएका छन्　।

विद्यार्थी नेताहरू पढाउँदैनन् मात्र, सरकारी जागिरमा समेत रहेका छन्　। अनेरास्ववियुका सचिवालय सदस्य चूडाराज ढकाल विद्यार्थी राजनीति मात्र गर्दैनन् खोटाङका जिल्ला विकास समितिका योजना अधिकृतको पेसासमेत सह्मालिरहेका छन्　। उनी करिब ६ महिनादेखि खोटाङको जिविस योजना अधिकृतका रूपमा कार्यरत छन्　। अनेरास्ववियुका नेताहरू एक वर्षअघिसम्म शिक्षण पेसामासमेत संलग्न थिए　। तर, अहिले उनीहरूले त्यो पेसा छाडेका छन्　।

विद्यार्थीको नेतृत्व गर्नेहरू शिक्षण वा अन्य पेसामा संलग्न हुनु अस्वाभाविक भएको विद्यार्थी नेताहरू नै बताउँछन्　। 'विद्यार्थी राजनीति वर्गीय पनि हो　। वर्गीय कुरा पनि उठाउनुपर्छ　। अर्को पेसामा लागेकाले विद्यार्थीका समस्या बुझ्न सक्दैन　।' नेविसंघका उपाध्यक्ष भूपेन्द्रजंग शाही भन्छन्, 'कहिलेकाहीँ विद्यार्थी नै शिक्षकको विरुद्धमा पनि लाग्नुपर्छ　।'