बिदाको दिन घटाउने प्रस्ताव

नारायण सापकोटा, वैशाख १३ - करिब एक सय दिनको बिदाले मुलुकको अर्थ व्यवस्थामा नकारात्मक असर परेको जनाउँदै अर्थमन्त्री सुरेन्द्र पाण्डेले यसको पुनरावलोकन प्रस्ताव मन्त्री परिषदमा पेस गरेका छन् ।

विभिन्न चाडपर्वका लागि दिन तोकेर बिदा दिने प्रचलन तोडदै एकमुष्ठ १५ दिन बिदा लिन पाउने प्रस्ताव गरिएको पाण्डेले बताए। 'राष्ट्रिय बिदा १० दिनसहित एकमुष्ट २५ दिन बिदा दिने र अरु सबै हटाउने प्रस्ताव गरेको छु,' उनले भने, 'यसका लागि राष्ट्रिय सहमति आवश्यक छ।'

दलहरु बीच सहमति भए बजेटमा यो प्रस्ताव समावेश गर्ने उनले दिए। आइतबार आयोजित अर्थ समितिको बैठकमा पूर्व अर्थमन्त्री रामशरण महतले बिदाको चर्को मार उत्पादन क्षमतामा परेको जनाउँदै यसलाई घटाउनुपर्ने माग राखेपछि पाण्डेले यो कुरा बताएका हुन् । (नागरिकन्यूज)